Студенттер біздің еліміздегі ең көне ғылыми-зерттеу институттарының бірімен танысты, ол жақында 90 жылдығын атап өтті. Зоология институты – Қазақстан Республикасындағы жануарлар әлемін зерттеу бойынша негізгі ғылыми ұйым, ол елдегі жануарлар дүниесін зерттеуге бағытталған іргелі және қолданбалы зерттеулерді үйлестіреді әрі жүргізеді.
Институт бойынша экскурсия кезінде студенттер бірнеше ғылыми зертханаларға барып, көп жаңа, пайдалы әрі қызықты ақпарат алды. Біздің қызметкерлер әр зертхананың немен айналысатынын, қандай зерттеулер жүргізетінін, қандай заманауи әдістер қолданатынын баяндап, зоологтың жұмыс ерекшеліктері, күнделікті еңбек, жетістіктер мен жаңалықтар жайлы әңгімелеп берді.
«Қаншама қызықты дүниелер бар екен!» – экскурсия барысында және зертханалардың коллекциялық материалдарымен танысу кезінде (Энтомология, Палеозоология, Орнитология және герпетология, Паразитология және т.б.) студенттерден, әсіресе бірінші курс студенттерінен, осындай әсерлерді жиі естуге болатын еді.
Өз кезегімізде, ғылымға қызығушылық танытатын жандарды көргеніміз бізді қашанда қуантады. Көздеріндегі ұшқын, қойылған сұрақтардың көптігі, алғысқа толы күлкі және шынайы қызығушылық – осының бәрі Қазақстандағы жануарлар дүниесін зерттеп, сақтауға, зоологияны насихаттауға, болашақ мамандықты саналы түрде таңдауға бағытталған ісімізді жалғастыруға шабыттандырады.
Жақында институт ғимаратында күрделі жөндеу жұмыстары аяқталды. Қазір біртіндеп жаңа орынға орнығып, зертханаларға заманауи жабдықтар орнатудамыз және жұмысқа қажетті құрылғылармен жабдықтап жатырмыз.
Институтқа жас мамандар қажет, сондықтан еліміздегі жоғары оқу орындарында зоология кафедралары қайта ашылып, биоәртүрлілікті зерттеу және оны қорғау жөніндегі ғылыми ұйымдар жаңа мамандармен толығады деп үміттенеміз!
Бұл іс-шара әл-Фараби атындағы ҚазҰУ Биология және биотехнология факультетінің Жас ғалымдар клубымен ынтымақтастық аясында өтті.
Студенттермен жаңа кездесулерді асыға күтеміз!
28.02.2025