14 қазанда Қазақстан Республикасы Зоология институтына Бельгиядағы Антверпен университетінің ректоры, профессор Хэрвиг Лейрс (Herwig Leirs) келді. Профессор Қазақстан Республикасына Бельгия Королінің ресми сапары аясында елімізге келген бельгиялық делегация құрамында болды.
Хэрвиг Лейрс – зоолог, популяциялар экологиясы, қолданбалы зоология және зооноздық инфекциялар эпидемиологиясы саласындағы сарапшы, KMDA (Антверпен корольдік зоологиялық қоғамы) басқарма төрағасы. Ол ғылыми қызметінің басым бөлігін кеміргіштерді, олардың биологиясын және популяцияларының динамикасы адамға қауіпті инфекциялардың, соның ішінде оба, хантавирустық инфекциялар, Эбола және Марбург қызбаларының таралуына қалай әсер ететінін зерттеуге арнаған. 2024 жылдан бастап Бельгияның жетекші жоғары оқу орындарының бірі – Антверпен университетінің ректоры қызметін атқарады.
Сапар барысында Хэрвиг Лейрс Зоология институтының ұжымымен, институт қызметінің негізгі бағыттарымен және ғылыми-зерттеу инфрақұрылымымен танысты. Профессорға институт зертханаларының жұмысы таныстырылып, ғылыми коллекция материалдары көрсетілді. Сонымен қатар жүргізіліп жатқан зерттеулер мен халықаралық ғылыми ынтымақтастықты дамыту мүмкіндіктері туралы ақпарат берілді.
Кездесу барысында Антверпен университеті мен Зоология институты арасындағы ынтымақтастық перспективаларын талқылауға ерекше назар аударылды. Тараптар өзара қызығушылық тудыратын бірлескен ғылыми қызметтің ықтимал бағыттарын қарастырып, екі мекеменің зерттеу ұжымдары арасында ұзақ мерзімді кәсіби байланыстар орнату мүмкіндіктерін талқылады.
Алдын ала келіссөздердің қорытындысы бойынша Антверпен университеті мен Зоология институты арасындағы ынтымақтастық туралы меморандум жобасы келісілді. Аталған құжат серіктестік қатынастарды одан әрі дамытуға және ғылыми-зерттеу саласындағы өзара іс-қимылдың нақты бағыттарын айқындауға негіз болады деп күтілуде.
Профессор Хэрвиг Лейрстің сапары Зоология институтының халықаралық ғылыми байланыстарын нығайтуға және еуропалық ғылыми ұйымдармен ынтымақтастық мүмкіндіктерін кеңейтуге бағытталған маңызды қадам болды.
14.10.2026 ж.
Зоология институтының материалдарын пайдаланған жағдайда ақпарат көзіне гиперсілтеме беру міндетті. Барлық құқықтар Қазақстан Республикасының «Авторлық құқық және сабақтас құқықтар туралы» Заңымен қорғалады.