Қазақстан Республикасы Зоология институтының бас ғылыми қызметкері, профессор Есенбекова Перизат Әбдіқайырқызы ЕҚТА қызметкерлеріне арналған екі ғылыми семинар өткізді.
1. «Жәндіктер және оларды зерттеу» – 25 сәуір күні Меркі мемлекеттік өңірлік табиғи паркінде өткен семинардың тақырыбы.
Табиғи парк 2025 жылдың тамыз айында құрылған. Оның ашылуы мемлекеттік, халықаралық және ғылыми ұйымдардың, соның ішінде ҚР Зоология институтының бірлескен жұмысының нәтижесінде мүмкін болды.
Институт мамандары табиғи парк ғылыми бөлімінің қызметкерлері үшін бұған дейін де бірқатар оқыту іс-шараларын өткізген болатын. Аталған семинар Жер бетіндегі тірі ағзалардың ең көп таралған тобы – жәндіктер фаунасын зерттеу әдістеріне арналды. Қатысушылар энтомологиялық материалдарды жинау әдістерімен, оларды сақтау, коллекцияларды рәсімдеу тәсілдерімен және энтомологиялық зерттеулерге қатысты өзге де өзекті мәселелермен таныстырылды.
2. Екінші семинар – «Ақсу-Жабағылы мемлекеттік табиғи қорығы аумағындағы энтомологиялық зерттеулер» – 15 мамыр күні қорықтың ғылыми бөлімі қызметкерлері мен ЕҚТА аумағында тәжірибеден өтіп жатқан экотуризм колледжінің студенттеріне арналды.
Семинар барысында 2018–2026 жылдар аралығында қорық аумағында жүргізілген энтомологиялық зерттеулер туралы мәліметтер ұсынылып, алынған ғылыми деректер мен Ақсу-Жабағылыда мекендейтін жәндіктердің фотосуреттері көрсетілді.
Осындай ғылыми семинарларды өткізу ЕҚТА қызметкерлерінің біліктілігін арттыруға, ғылыми зерттеулерді дамытуға және табиғат қорғау мен ғылыми ұйымдар арасындағы ынтымақтастықты нығайтуға ықпал етеді.
Фотосуреттер: Есенбекова Перизат
28.05.2026 ж.