Зоология институтының гидробиология және экотоксикология зертханасының меңгерушісі, биология ғылымдарының докторы, профессор Е.Г. Крупа және кіші ғылыми қызметкер А.Н. Кенжеева 2026 жылғы 13–21 мамыр аралығында BR24993060 «Батыс Тянь-Шаньның жабайы жануарлар кадастрын жүргізуге арналған ақпараттық жүйені әзірлеу» ғылыми-техникалық бағдарламасын іске асыру аясында іс-сапармен болды.
Іс-сапардың негізгі мақсаттары:
- Ресей ғылым академиясының А.Н. Северцов атындағы Экология және эволюция проблемалары институтында (Мәскеу қ.) зоопланктон сынамаларына ревизия жүргізу және таксономиялық тұрғыдан даулы түрлердің құрамын нақтылау.
- Санкт-Петербург қаласында өткен халықаралық қатысумен ұйымдастырылған V Бүкілресейлік ғылыми-практикалық «Шаянтәрізділерді зерттеудің өзекті мәселелері» конференциясына қатысу.
- Халықаралық ғылыми ынтымақтастықты кеңейту және нығайту.
РҒА-ның А.Н. Северцов атындағы Экология және эволюция проблемалары институтында су қауымдастықтарының экологиясы және инвазиялар зертханасының қызметкерлері, биология ғылымдарының кандидаты П.Г. Гарибян және биология ғылымдарының докторы А.А. Котовпен бірлесіп зоопланктон бойынша коллекциялық және ғылыми-зерттеу материалдарына ревизия жүргізілді. Жұмыс барысында 11 сынама қаралып, Daphniidae, Chydoridae, Bosminidae және Macrothricidae тұқымдастары өкілдерінің диагностикалық белгілері бойынша ғылыми кеңестер алынды. Сонымен қатар Chydorus sphaericus, Scapholeberis mucronata, Daphnia curvirostris, Diaphanosoma orghidani және Macrothrix hirsuticornis түрлерінің идентификациясы нақтыланды. Бұдан бөлек, су экожүйелерінің биоалуантүрлілігін зерттеу және ғылыми ынтымақтастықты одан әрі дамыту мәселелері бойынша тәжірибе алмасу өтті.
Ғылыми конференция 2026 жылғы 18–20 мамыр аралығында Ресей ғылым академиясының Зоология институты базасында өтті. Қазақстан Республикасы Зоология институтының қызметкерлері конференцияда екі баяндама ұсынды.
- Е.Г. Крупа пленарлық отырыста «Қазақстанның Calanoida (Crustacea: Copepoda) фаунасы» атты баяндама жасап, көпжылдық зерттеулердің нәтижелерін таныстырды және республикадағы әртүрлі су айдындарында кездесетін Calanoida отряды өкілдерінің түрлік алуантүрлілігі жөніндегі деректерді жинақтады.
- Докторант А.Н. Кенжеева ғылыми жетекшісі Е.Г. Крупамен бірлесіп дайындалған «Оңтүстік Қазақстан су айдындарының планктондық шаянтәрізділері» атты постерлік баяндаманы ұсынды. Постерлік баяндамалар байқауының қорытындысы бойынша жұмыс конференция ұйымдастырушылары тарапынан жоғары бағаланып, III орынға ие болды.
Конференция бағдарламасына жалпы саны 100-ге жуық баяндама енгізілді, оның ішінде 9 пленарлық, 51 секциялық және 36 постерлік баяндама болды. Баяндамалар тақырыбы шаянтәрізділерді (Crustacea) зерттеудің кең ауқымды мәселелерін қамтыды. Бұл гидробионттар тобы су экожүйелерінің тұрақты жұмыс істеуінде маңызды рөл атқарып, қоршаған ортаның жай-күйін бағалауда биоиндикатор ретінде қызмет етеді.
Конференция аясында жетекші карцинолог мамандармен – В.Р. Алексеевпен (РҒА Зоология институты), А.А. Котовпен (РҒА Экология және эволюция проблемалары институты) және Н.А. Березинамен (РҒА Зоология институты) кездесулер мен ғылыми консультациялар өткізілді. Кездесулер барысында шаянтәрізділердің систематикасы, биоалуантүрлілігі мен экологиясы мәселелері, сондай-ақ болашақтағы ынтымақтастық перспективалары талқыланды. Іс-сапар нәтижесінде бірқатар даулы түрлердің таксономиялық мәртебесі нақтыланып, қазақстандық зерттеулердің нәтижелері халықаралық ғылыми қауымдастыққа таныстырылды. Сонымен қатар кәсіби байланыстар кеңейіп, Ресей Федерациясының жетекші ғылыми орталықтарымен академиялық ынтымақтастық нығая түсті.
05.06.2026